أحيان ياخذني الوله لكن أحيـان
أرجع وأقول لهـ الوله من خذاني ؟

إلا على طاري الوله كم مضى الآن؟
وأنتي بعيده عن سمـاي ومكاني

البارحه أمطر لك الشوق هتــان
حتى إمتلا صدري حنين وأغاني

قلتي: ولهت ..وقلت لك:إييييه ولهان
قلتي غلاك وقلت: بعثر كيــاني

السندباد اللي تغرّب له أزمـــان
ملّ البحر واشتاق قرب المــواني

مثل الغريب اللي فقد حضن الأوطان
وما عوّضه عن موطنه شي ثــاني

جيتك أشيل الشوق لهفة وتحنان
لا الياس ياس ولا الأماني أماني

وكان السهر كحّل عيونك والأجفان
وطالت دقايق ساعتك والثــواني

أمانتك ضمّي الغلا قدر الإمكان
في داخلك بين الضلوع المحاني

ولو دمعتك طاحت على ورد الأوجان
عادي إذا (غــالي) وطاحت عشاني

ياملهمة كل القصــايد والأوزان
لا غبت عنك لاتقولي : نســـاني

لو هو خذاني عنك غيبة ونسيان
ماكان لا مــرّ الوله لك خذاني

ل: محمد المداد