اخــــــــــــت القــــــــصايد
لعنبوا بعض القصايد كان مافيها حلا
ماتروح الا وتترك للحنايا جلجله
تبتدي مثل المزون اللي تسولف للكلا
ولاخذت قامت ترزّم مثل شهبٌ منزله
فوق صدر الشاعر اللي عن طواريقه جلا
لين شاف اخت القصايد بالقصايد مقبله
ياهلا بـ اخت القصايد كثر شوقي ياهلا
اقلطي بين الحنايا وافهقي جمر الوله
كل ضلعٍ من ضلوعي حافظٍ درس الولا
مثل حفظك للعفاف وللشرف يامدهله
سولفي كذا السوالف تنسمع والا فلا
وان بغيتيني اسولف .. اسأليني اسئله
اسأليني وابتديها .. بالنهار اللي تلا ..
ليلة ان الجرح يقرا فـ الضلوع البسمله
واسأليني عن زماااني كم شرب فيّ وكلا
انتهي من مشكله والقى وراها مشكله
المشاكل بهذلتني في غيابك ... والبلا ...
مالقيت اللي احط السر عنده وازهله
كل مااسمع - كيف حالك؟؟ - ينقبض جفني على ..
دمعةٍ تبغى تقول الحال دمع ومهزله
وابلع العبره واقول : بخير والهم انجلا
وآخر الهرج آتلعثم فيه وانقض أوله
فهد
|