هذا ماحدث لي اليوم بصيدلية الــ........ شي غريب فعلاً ...!!

اليوم الساعه التاسعه مساءً دخلت الصيدليه بشتري بعض ادويه الزكام لأحد الاصدقاء ولم يكن
بالصيدليه الا أنا والصيدلي وأخذت أشرح له حالة صديقي فقال بسيطه أنا راح أعطيك بعض الادويه وأن شاء الله راح تتحسن حالته وفجأه دخلت أحدى النساء وقالت للصيدلي وهو يكلمني هيه عندك حليب بروميل الصيدلي قال شوفي الرف ده فيه كل أنواع الحليب طبعاً الصيدلي أخذ يشرح لي كم مره يستخدم الدواء وهو يشرح الا الحرمه بحلقه وهي تقول.. مالقيت بروميل قال يعني خلص والله أسف شوفي صيدليه ثانيه فردت وليه ياحمار ماتجيبون بروميل يعني بس ودكم تتعبوني طبعاً الصيدلي صابته الدهشه وقال بتقولي أيه فردت عليه نفس الكلام طبعاً أنا تفاجأة
معقوله فرد الصيدلي الحماره أنتي ياقليلة الادب فأخذت أحد أنواع الحليب ورمته على الصيدلي
طبعاً أنا ماتمالكت أعصابي ونويت أصفقه بس قلت ياولد خلك حليم.. فقلت يابنت الصيدليه مافيها بروميل.. زين ليه ماتدورينه بأحد الصيدليات الثانيه.. قالت وأنت وش دخلك.. يوم ضاع وجهي قلت عز الله أنه ماكذب هالصيدلي يالحماره الخلى بس الخلى أنا قلت هالكلمتين يوم جتك
يمي وش تقول قلت اللي سمعتيه يالخبله قالت هذا وأنت سعودي وتقول هالكلام وش خليت للأجنبي وهي تدنه بكوه هههههههه قلت ربي لك الحمد أنا يوم أقبلت علي أحسبه تبي تبلاني وهمن العن جدفه قلت لها يامره وش عندك بالضبط وش اللي تبينه..؟؟؟

قالت أنا ساكنه هنا وهذي أقرب صيدليه لبيتنا وزوجي خذوه يم مكه عسكري وأهلي يبعدون عني حولي الــ100 كيلوا والولد يبكي يبي يرضع والحليب مخلص ولاينفع له الا بروميل قلت زين بعد عشر دقايق القاك عند باب الصيدليه بروح أدورلك بروميل وارجع وفعلاً رحت وجبت لها بروميل وأعطيتها فقالت الله يعطيك العافيه قسم بالله أن الولد مات من الصياح فقلت ياأختي الغلط عليك وعلى والده اللي راح وهو ماأمن لكم أبسط الاساسيات وقامت تبكي مره ثانيه وهي تقول والله أني متأسفه ودخلت على الصيدلي وقالت أنا أسفه وطلعت وراحت لبيتها الله يستر عليها وعلى ولايانا...!!!

وش تقولون باللي صار..؟؟؟

والله يابو راكان مادري مشكلة كبيرة ؟؟؟

بس تصرفك جيد جداً وبيض الله وجهك وجزاك الله خير

بس هي وش علامه معصبه على طول يمكن فيها (( مرض نفسي))

الله يديم الستر والعافية

والله شئ غريب فعلاً وعجيب...الي اعرفه أنه الي محتاج للمساعده يتكلم على الاقل او يطلب من الصيدلي بنفسه ولا يرفع الصوت ..
والوم كله على الزوج لانه مهما كان هذي حرمه..ولزوم يئمن لهم كل شئ..

جزاك الله الف خير.. وبارك الله فيك ابو راكان... ماسويته مع الحرمه موقف يرفع الرآس وأنا اخوك.

(

(فردت وليه ياحمار ماتجيبون بروميل يعني بس ودكم تتعبوني)

حينما تكون " كلكم راع وكلكم مسؤؤل عن رعيته " عبادة نتعبد بها الى الله ربما حينها يمكننا أن نلحظ شمس التقدم تشرق على امتنا الاسلاميه
مديرنا الفاضل / ابوركان
اعتقد ان كل المسؤلية تقع على الزوج
هذا الموقف ممكن ان يكون بسيط نوعا ما
لكن هناك امور اعظم لاقدر الله مثل مرض احد الاطفال او حدوث مشكلة اخرى

مااقدر اقول الاحسبنا الله ونعم الوكيل
وجزاك الله خيرا على موقفك النبيل

تقبل مروري

ابو راكااااان
ما شاء الله عليك يا قو صبرك !!!

الله لا يبلانا .. الناس ما عاد تستحي والله
لكن المفترض يكون فيه اخلاق للتعامل مع الناس

إنما الأمم الأخلاق ما بقيت ...
.... فإن همُ ذهبت اخلاقهم ذهبو ...

وجزاك الله خير على المساعدة ويمكن عندها ظروف
خلتها تفقد السيطرة على اعصابها يوم ما لقت الحليب

مشكوور على الموضوع
والله كان تصرف ذكي منك

ماتنلام المراه عنده وغد ويصيح ذابحوه الجوع وعليه ضغوطات وزوجه ماشي لمكه ومخليهم

لكن ماتاصل انه تتكلم على هالمصري بالطريقه هذي

واللي اعجبن يابو راكان هو تصرفك الطيب

جزاك الله خير

تحيتي

بيض الله وجهك يالغالي وماقصرت

وانا احط اللوم على زوجها اللي ماامن لهم كل متطلباتهم بالبيت او من اقاربه يشوف وش متطلبات الزوجه
والثانيه احط اللوم على الجهه العسكريه المفروض تشوف مشاكل العسكر وتراعي ظروفهم
بس قالوها >> عسكريه عوجا

وانا اعذرها صراحه ولدها يصيح بالبيت وهي تدور له حليب ماتنلام والله

بيض الله وجيهكم جميعاً!!
نعم المرأه معذوره وكما تعلمون عندما تحسن المرأه بأن ولدها في خطر ماتدري كيف تتصرف!!
لازوج ولا أهل عندها ولكن اللوم والخطاء بالأول والاخير على زوجها ومن ثم على أهلها!!
الذين تركوها لحالها في بيت هي وصغيرها لاحامي ولامجيب!!
فعلاً هذه الامور هي باب من أبواب التفكك الاسري!!
تسلمون وعساكم دوم على القوه..!!!

فعلا اللوم على زوجها اللي ما امن اغراض بيته قبل يروح , ترك زوجته تدور اغراضها بنفسها
والا على الاقل موديها عند اهلها مشوار ساعة (100كم)
ارى ان كل اللوم يقع على عاتق الزوج (كلكم راع وكلكم مسؤول عن رعيته)
وبيض الله وجهك على تصرفك يابوراكان
دمت بود